Occitània —lo territòri de la lenga occitana— compren de regions istoricas que s’imbrican las unas dins las autras e qu’an agut de contorns variables dins l’istòria. Las regions occitanas pus grandas son Aquitània (o Guiana al sens larg), Auvèrnhe, lo sud del Dalfinat, Gasconha, Lemosin, Provença e Lengadòc. De contradas occitanas pus pichonas, de còps inclusas dins las precedentas, son Agenés, Aran, Bearn, Borbonés, Carcin, l’èst d’Engolmés, lo Comtat de Fois, l’oèst de Forés, Gavaudan, la Marcha, lo Principat de Mónegue, la Comtat de Niça (o lo País Niçard), Peiregòrd, Roergue, las Valadas, Velai, lo Comtat Venaicin e Vivarés.
Es de notar que los espacis dels dialèctes occitans correspondon pas exactament a las regions istoricas.
Al nivèl administratiu, Occitània se devesís en quatre zònas politicas que dependon de quatre Estats diferents.
• L’Occitània Granda es la granda partida d’Occitània que depend de l’Estat francés, correntament li dison “lo Miègjorn” o “lo Sud”.
❧ Remarca. “Lo Miègjorn” e “lo Sud” son de tèrmes inexactes; en realitat, Occitània a una importància internacionala e es al centre de las lengas neolatinas, a de se definir a respècte d’ela meteissa, se pòt pas definir coma un “Sud” per rapòrt a França.
• Las Valadas (o las Valadas Occitanas) son la partida d’Occitània que depend de l’Estat italian. Se situan dins los Alps.
• Mónegue es una ciutat e un Estat sobeiran dins Occitània.
• Aran (o la Val d’Aran) es la partida d’Occitània que depend del territòri de Catalonha e de l’Estat espanhòl. Se tròba dins los Pirenèus.
A un nivèl administratiu inferior, Occitània es cobèrta per 7 regions oficialas.
• Dins l’Estat francés, 5 regions oficialas cobrisson de partidas d’Occitània.
— lo Centre-Val de Léger
— Auvèrnhe-Ròse-Alps
— la Nòva Aquitània
— Provença-Alps-Còsta d’Azur
— la Region de Tolosa e Montpelhièr (dicha “region Occitània”).
• Dins l’Estat italian, 2 regions oficialas cobrisson de partidas d’Occitània.
— Piemont
— Ligúria.
• La tèrra occitana d’Aran depend de l’Estat espanhòl e de l’entitat administrativa de Catalonha.
A un nivèl administratiu mai pichon, Occitània se parteja en departaments e en províncias.
• Dins l’Estat francés, 39 departaments cobrisson de partidas d’Occitània. I a ben 39 departaments en Occitània e non pas 31 o 32 coma se crei sovent: Alèir (03), los Alps d’Auta Provença (04), los Auts Alps (05), los Alps Maritims (06), Ardecha (07), Arièja (09), Aude (11), Avairon (12), las Bocas de Ròse (13), Cantal (15), Charanta (16), Char (18), Corresa (19), Cruesa (23), Dordonha (24), Droma (26), Gard (30), la Nauta Garona (31), Gers (32), Gironda (33), Eraur (34), Endre (36), Isèra (38), las Lanas (40), Léger (42), lo Naut Léger (43), Òlt (46), Òlt e Garona (47), Losera (48), lo Puei Domat (63), los Pirenèus Atlantics (64), los Nauts Pirenèus (65), los Pirenèus Orientals (66), Tarn (81), Tarn e Garona (82), Var (83), Vauclusa (84), Vinhana (86) e la Nauta Vinhana (87).
• Dins l’Estat italian, 3 províncias cobrisson de partidas d’Occitània: Turin (TO), Coni (CN) e Impèria (IM).
• Dins l’Estat espanhòl e dins lo territòri oficial de Catalonha, 1 província cobrís la tèrra occitana d’Aran: es la província de Lhèida.