Estatuts

Adoptats en 1997, actualizats en 2021

Article 1

Se fonda entre los aderents als estatuts presents una associacion regida per la lei del 1r de julhet de 1901 e pel decret del 16 d’agost de 1901 que son títol es “Conselh de la Lenga Occitana”.

Article 2

La tòca d’aquesta associacion es de codificar la lenga occitana dins sa nòrma classica e practica.

Article 3

Segon aquesta tòca, lo Conselh de la Lenga Occitana se declara competent dins totas las regions de lenga occitana.

Article 4 — Sèti social

Lo sèti social es fixat a:

residéncia la Segurana

60 Baloard Virgili Barèl

06300 Niça

Se lo poirà transferir per simpla decision del burèu. La ratificacion per l’Amassada Generala serà necessària.

Article 5 — Sòcis

Lo Conselh de la Lenga Occitana se compausa de sòcis actius que s’engatjan a pagar un escotisson fixat annualament per l’Amassada Generala.

Article 6 — Admission

L’Amassada Generala admet los sòcis novèls del Conselh de la Lenga Occitana per cooptacion. Los critèris d’admission son aquestes:

a) téner una competéncia en lingüistica occitana,

b) aprovar las tòcas de l’associacion,

c) s’engatjar a aplicar e propagar las convencions lingüisticas del Conselh de la Lenga Occitana.

Se pòt admetre de ciutadans de quin Estat que siá.

Article 7

La qualitat de sòci se pèrd per:

a) la demission,

b) lo decès,

c) la radiacion que la pronóncia l’Amassada Generala per motiu grèu o per aver pas pagat l’escotisson. S’invita l’interessat a se presentar davant l’Amassada Generala per fornir d’explicas.

Article 8

Las ressorsas del Conselh de la Lenga Occitana comprenon:

a) los escotissons,

b) las subvencions de l’Estat, de las collectivitats territorialas, de las institucions europèas e internacionalas o de divèrses organismes oficials,

c) las donacions de sosten,

d) lo produch de la venda de publicacions, objèctes o bens divèrses del Conselh de la Lenga Occitana, tant coma dels revenguts d’aquestes bens.

Article 9 — Lo Burèu

Lo Conselh de la Lenga Occitana es coordenat per un Burèu de sèt fins a quinze membres que l’Amassada Generala l’elegís per tres ans. Los sòcis del Burèu se pòdon far reelegir.

L’Amassada Generala designa los diferents sòcis que compausan lo Burèu, çò es:

a) un president,

b) dos vicepresidents,

c) un secretari,

d) un clavaire,

e) eventualement, de responsables encargats d’una mission o d’un domeni particular.

En cas de vacanças, lo Burèu fa remplaçar provisòriament un sòci qu’a daissada sa plaça. L’Amassada Generala seguenta decidís de son remplaçament definitiu.

Article 10 — Reünion del Burèu

Lo Burèu se reünís o se concèrta almens un còp cada sièis meses. Lo convòca lo president, o lo secretari en acòrdi amb lo president.

Las decisions se prenon a la majoritat de las voses dels membres del Burèu.

Un membre del Burèu qu’agís en nom del Conselh de la Lenga Occitana ne rend compte davant los autres membres del Burèu, e tanben davant l’Amassada Generala.

L’Amassada Generala, a la majoritat dels dos tèrces dels sòcis presents o representats, pòt precisar, modificar o invalidar una decision del Burèu.

Article 11 — L’Amassada Generala

L’Amassada Generala ordinària compren totes los sòcis del Conselh de la Lenga Occitana. Se reünís almens un còp per an.

Lo secretari convòca los sòcis almens quinze jorns abans la data fixada. L’òrdre del jorn es indicat sus las convocacions.

Las contribucions per l’amassada se pòdon mandar a l’avança: siá lo secretari jonh las diferentas contribucions a l’òrdre del jorn, siá l’autor d’una contribucion la manda el meteis als autres sòcis. Las questions escrichas d’un organisme o d’un particular exteriors al Conselh de la Lenga Occitana pòdon constituir atanben de contribucions.

Lo president, assistit dels membres del Burèu, presidís l’amassada e expausa la situacion morala de l’associacion. Lo clavaire rend compte de sa gestion.

S’examina las demandas d’admission de sòcis novèls, que son presentats pel Burèu.

Après aver agotat l’òrdre del jorn, s’es necessari, òm remplaça los membres del burèu sortent.

Se pren las decisions a la majoritat dels sòcis presents o representats. Un sòci present pòt téner al maximum un sol mandat de sòci representat.

Article 12 — Amassada generala extraordinària

Una Amassada Generala extraordinària se pòt reünir a la demanda d’almens un tèrç dels sòcis. La convòca lo president o lo secretari.

Se prepara e s’organiza coma una Amassada Generala ordinària.

Article 13 — Publicacions

Lo Burèu consigna las decisions de codificacion lingüistica del Conselh de la Lenga Occitana: ne ten un catalòg oficial qu’es regularament actualizat, completat e accessible al grand public. Pòt aver la forma d’un bulletin, d’una revista, d’annals o d’un autre supòrt adeqüat.

Lo Burèu fa conóisser al grand public sas nòvas decisions de codificacion lingüistica.

Lo Burèu pòt ajudar o recomandar d’obratges que son compatibles amb las tòcas del Conselh de la Lenga Occitana.

Article 14 — Convencion intèrna

Se pòt establir una convencion intèrna que l’Amassada Generala l’adòpta. Aquesta Convencion a de fixar los ponches divèrses de foncionament que los estatuts los an pas previstes.

Article 15 — Dissolucion

Los dos tèrces dels sòcis aderents pòdon dissòlver l’associacion a una Amassada Generala convocada per aquel motiu. L’amassada designa un o mai d’un liquidator: l’actiu es devolut conformament a l’article 9 de la lei del 1r de julhet de 1901 e al decret del 16 d’agost de 1901.