Lo Conselh de la Lenga Occitana retròba sa libertat d’accion e s’engatja per l’unitat

Comunicat · 28 d’agost de 2021

Lo Conselh de la Lenga Occitana (CLO) es l’organisme tradicional de codificacion de l’occitan. Se fondèt en 1996-1997, trabalhèt regularament de 1997 a 2007 e a daissat de solucions claras als usatgièrs per practicar l’occitan.

Malaürosament, lo CLO foguèt confrontat a d’atacas e subiguèt una longa paralisi forçada de 2007 a 2021. Mas uèi, aquela paralisi es terminada: lo CLO a retrobat sa libertat d’accion dempuei genièr de 2021 e repren sas activitats normalas. Sos sòcis an decidit de prene d’iniciativas en favor de la lenga.

Desenant lo CLO s’engatja per cercar de solucions constructivas:

• fàcia a la baissa del nombre de parlants de l’occitan,

• fàcia a la manca de reconeissença publica de la lenga,

• fàcia a la pèrda de competéncias escrichas e oralas dins l’occitanisme,

• fàcia a la multiplicacion dels organismes novèls que promòvon de solucions desparièras.

Insistissèm sus una realitat fondamentala: es pas l’accion novèla del CLO que risca d’engendrar una confusion. Lo CLO es pas responsable de las dificultats recentas que se son acomoladas aquestes darrièrs ans. Lo CLO non fa res que constatar la situacion. Lo CLO es pas “una acadèmia de mai”, tot lo contrari, es un organisme ainat e pus ancian.

Desenant, a partir de 2021, lo CLO agirà amb d’iniciativas simplas e constructivas.

1) Lo CLO farà conéisser l’estat de la nòrma classica de l’occitan, tala coma s’èra estabilizada fins en 2007, dins la continuitat dels trabalhs de Loís Alibèrt, Robèrt Lafont e Pèire Bèc (çò qu’empacharà pas de resòlver certanas incoeréncias, se ne vira).

2) Lo CLO sosten l’estabilitat de la nòrma. Lo CLO s’abstendrà dins lo futur pròche de promulgar de règlas novèlas per lo lexic ja plan establit. Aital lo CLO demostrarà fòrça clarament que trabalha dins lo sens de l’òrdre e de l’estabilitat.

3) Lo CLO prepausarà de solucions precisas per restablir l’unitat de la nòrma. Cercarà de restaurar los ligams entre los especialistas en creant un espaci alargat de discussion. Tanben prepausarà d’entreténer de relacions constructivas amb los organismes novèls que son apareguts après 2007.

4) Lo CLO s’impausa un estandard scientific corrècte per menar son trabalh. Seguís los metòdes internacionals de la lingüistica, qu’es la sciéncia adeqüata per trabalhar sus la lenga.

5) Son los lingüistas que govèrnan lo CLO, que definisson sos objectius e que verifican la coeréncia de sas publicacions.

6) Lo CLO aculhís en son sen de lingüistas e de protagonistas culturals qu’aderisson als metòdes de la lingüistica.

7) Lo CLO opausa pas l’occitan estandard e l’occitan local. L’occitan estandard a vocacion d’inclure de dialèctes estandardizats e convergents (lenga pluricentrica) en acòrdi amb las visions de Loís Alibèrt, de Robèrt Lafont e de Pèire Bèc.

8) Lo CLO es competent dins totes los territòris de lenga occitana. Sosten una nòrma comuna que se definís en foncion de la continuitat de la lenga e non pas en foncion dels Estats.

9) Lo CLO a un foncionament democratic e transparent. Sas reünions faguèron e faràn l’objècte de comptes renduts sistematics.

10) Lo CLO trabalha per reliar las diferentas generacions de l’occitanisme: velha a la continuitat de las institucions e a la transmission de las coneissenças scientificas. L’installacion d’una nòrma lingüistica establa, de generacion en generacion, va dins aquel sens.

Conselh de la Lenga Occitana